五南官網-旅行文學：以臺灣為例的經驗佮書寫

語言、文學-語言-臺語
語言、文學-現代文學
旅行文學：以臺灣為例的經驗佮書寫

作　　者：魏俊陽
出版社別：五南
出版日期：2026/09/01(1版1刷)
ＩＳＢＮ：978-626-442-746-3
E I S B N：9786264427470
書　　號：1XQJ
頁　　數：208
開　　數：20K
定　　價：380元
優惠價格：304元

主題書展　9/1-10/31 2026五南開學祭開學儀式感從備齊課本開始！／教科書8折起即將絕版區99元起全館滿550打95折滿399即贈一本《現代日本外交史》(贈完為止)
滿額優惠折扣　9/1-10/31 2026五南開學祭全館滿550打95折

◎專文推薦
新北市鶯歌區永吉國小校長鍾信昌
活水來冊房版主、新北市三峽區龍埔國小老師黃震南

◎徛名推薦
臺文專家「順聰款」鄭順聰
臺灣師範大學臺文系碩士班系友：
新北市三峽區三峽國小黃如莉老師
臺中市太平區新高國小李亭老師
桃園市桃園區福豐國中許正輝老師

◎專文推薦
新北市鶯歌區永吉國小校長鍾信昌
活水來冊房版主、新北市三峽區龍埔國小老師黃震南

◎徛名推薦
臺文專家「順聰款」鄭順聰
臺灣師範大學臺文系碩士班系友：
新北市三峽區三峽國小黃如莉老師
臺中市太平區新高國小李亭老師
桃園市桃園區福豐國中許正輝老師

～以臺灣旅行文學為核心，結合感官書寫、文化觀察和地方記持，走揣旅行、權力、身體經驗和歷史空間的多重交織。～

　　《旅行文學：以臺灣為例的經驗佮書寫》對清代〈東番記〉到當代城市散文，串連臺灣旅行書寫的歷史脈絡，𤆬領讀者行入山林、街仔路、海岸和飯桌仔之間的感官世界。本冊結合理論、文學佮田野觀察，深入走揣旅行內底的視覺、氣味、聲音和味覺經驗，佮旅行書寫尻脊後的文化權力、地方認同佮歷史記持。內容涵蓋清代探勘、日治旅行、戰後城市書寫、地方食食文化和現代旅遊媒介，兼顧學術深度佮文學美感。無論是文學研究者、旅行愛好者，抑是關心臺灣文化的人，攏會當對本冊重新理解「旅行」按怎成做觀看臺灣、了解世界和認捌自我的方式。

魏俊陽

◎現任
新北市永和區秀朗國小教師
臺灣師範大學通識教育中心兼任助理教授
◎曾任
教育部中央輔導團本土語文組副組長、組員
新北市閩南語輔導團團員
全國語文競賽閩南語演說評審
新北市語文競賽閩南語演說、字音字形培訓老師
新北市、桃園市語文競賽閩南語演說、字音字形評審
◎語言認證
教育部105年度閩南語認證專業級
◎語文競賽
114年全國語文競賽臺灣台語演說教師組特優
◎著作
《臺灣台語認證我上強1：伊索寓言》
《臺灣台語認證我上強2：台語四格圖學習新課綱素養》
《臺語文素養導向教學全攻略》
《讀寫合一的課堂風景：國語文閱讀與寫作之旅》
《台中　玩盡台灣全中部！》2025-26激新版
I Can旅遊系列06 《高雄墾丁台南　玩盡台灣南部+澎湖！》2025-26激新版
I Can旅遊系列11《上海　蘇杭+7大水鄉深度遊》2026-27激新版
I Can旅遊系列18《沖繩　琉球群島Chill度遊！》2026-27激新版
I Can旅遊系列25《北海道　花海雪國Chill度遊！》激新版
◎共同著作
《十二年新課綱本土語文教材教法》
《十二年國民基本教育閩南語文差異化教學補充教材（國中階段）試用版》

推薦序1：佇行走中開展感官，佮土地深度對話／新北市鶯歌區永吉國小校長──鍾信昌

　　旅行的本質，到底是地理空間的徙振動，猶是心靈認知的轉變？當代旅行理論學者Carl Thompson捌講過，旅行文學是一種「真實和想像之間的混合文本」。讀完這本《旅行文學：以臺灣為例的經驗佮書寫》，讀者會當發現，臺灣這粒島嶼佇無時代文人的筆下，毋但是會當治理的疆域，閣較是充滿溫度和氣味的感官場域。

　　這本冊毋但是一部臺灣書寫的編年史，閣較是一場𤆬領讀者軁過時空的「五感實踐」。本文作者，我亦師亦友的俊陽老師，巧妙共臺灣旅行文學劃分做幾个關鍵層次：對明清時期的探勘佮疆域觀察，到日治時期的現代化調查，閣到戰後散文內底的流浪漂泊，最後歸結佇當代食食和城市生活的深度描繪。

　　佇歷史的長河內底，咱看見陳第佇〈東番記〉裡初探異地的驚異，郁永河佇〈裨海紀遊〉內底結合科學佮詩性的探勘，和黃叔璥佇《臺海使槎錄》中制度化的治理視角。遮的文本證明「行走」就是智識生產的過程。進入日治時期，旅行閣較予人賦予現代性的修辭，透過張麗俊、林獻堂等人的日記，咱讀著殖民體制內底，地方菁英按怎透過旅行揣轉來自我的文化主體性。

　　這本冊上蓋使人入迷的部分，是對「感官經驗」的深刻探討。旅行毋但干焦是看見風景，閣較是聲音、氣味佮味覺的交織。作者精準指出，當代作家親像洪愛珠佇《老派少女購物路線》內底，共菜市仔轉化做味覺的地圖，抑是葉怡蘭佇日常煮食內底實踐「生活旅行」。遮的書寫予咱意識著，旅行無一定愛佇遠方，只要開啟感官，日常的街仔路、巷仔內佮飯桌仔，攏會當成做文化再生的場域。

　　另外，冊內底嘛關心數位時代的轉向。當 YouTube、Instagram 取代傳統導覽手冊，旅行敘事變甲閣較碎片化而且充滿影像動感。不而過，無論媒介按怎變遷，就親像洪伯邑教授所提倡的「田野倫理」：旅行者必須願意停落來聆聽，用尊重和互惠的姿態共地方的大門拍開。

　　這是一本邀請讀者「𤆬身體去閱讀」的冊。伊共咱講，每一段旅程的文字攏咧塑造世界，同時嘛咧排除抑是召喚某一寡聲音。透過這本冊，咱會當學會曉按怎對視覺中心轉向多感官的參與，佇山林、城市、離島的行走內底，重新連結人佮土地的關係。

　　誠心推薦這部作品予每一位佮意行走、疼惜臺灣這塊土地的讀者。

－－－－－－－－－－－－－－－－－－－－－－－－－－－－－－－－－－－－－－－－－

推薦序2：台文開竅，感受臺灣／活水來冊房版主、新北市三峽區龍埔國小老師──黃震南

　　有人講「冊愛加讀，所在愛行透」，毋過若是會當共「行路」的經驗，化做「寫冊」的學問，彼種境界就閣較懸。我佮俊陽老師熟似十外冬，較早伊就不時揣我替伊寫新冊的頭序，寫到尾我攏強欲記袂牢到底寫過幾本矣。有一擺，為著確定伊頂一本冊的名，走去博客來網路書店搜揣，結果發現佇一排台文作品內底，竟然有插幾本旅遊冊。彼陣我閣想講應該是「堂的兼蟯的」──名姓爾，後來才知影，原來這就是俊陽老師的別才：旅遊專家！

　　俊陽老師毋但有食福、𨑨迌內行，閣進一步共旅遊提升做一門學問。伊佇臺灣師範大學通識中心兼課，用咱上親切的台語教冊，教學生按怎欣賞「旅遊文學」。伊將台文的底蒂佮旅遊的專業智識結合，這種「手骨寫台文、雙跤踏旅途」的實作，實在予人呵咾甲會觸舌。啊這本《旅行文學：以臺灣為例的經驗佮書寫》，就是俊陽老師這幾年來，用心計較、嘔心血編寫的成果。

　　這本冊上顯目出擢的所在，就是伊突破傳統旅行書寫「怙看的」的束縛。現代人出外旅遊，定定是「翕相機先食」，逐家趕緊緊去「頓khà-looh」、翕相，追求的是目睭的享受。毋過俊陽老師佇冊裡強調，建立「地方意識」的關鍵，顛倒是佇耳空聽、喙舌啖佮鼻空鼻。伊用Carl Thompson的理論做基礎，𤆬領讀者去聽「聲音地景」，去揣「味覺記持」。按呢的旅行，除了是地理空間的遷徙，嘛是身軀佮土地深深的搭峇。

　　冊內底閣用足大篇，清點臺灣旅遊文學的頭來尾去。對清朝郁永河〈裨海紀遊〉彼種敢若咧探險的自然描寫，到日本時代文人寫佇日記的日常生活；甚至連這馬洪愛珠《老派少女購物路線》彼種都市人的生活對話，俊陽老師攏一一整理好勢，展現出臺灣人「按怎看」的演變史，咱會當看著咱的祖先佮現代人，是用啥款的角度來欣賞這塊土地。

　　讀到冊稿後半段，講著大稻埕街仔的感官想像，到甲旅遊會當促進文化修復佮再生，我心肝底感覺特別親切，嘛想起一段往事。

　　回想1990年代，阮阿爸捌佇故鄉附近擔任「社區營造」的解說員。彼陣我和阿母定定去鬥相共，招待遊客兼綴咧聽導覽。阿爸真有喙水、講笑詼袂輸竹管倒豆，我攏恬恬佇邊仔觀察遊客的反應，偷學欲按怎共地方的故事講予人聽會落心。

　　十冬後，蒜頭糖廠因為納莉風颱無閣做糖，開始轉型做觀光。阿爸負責規畫路線、安排解說內容，創立「坐五分仔車聽導覽」的特色。彼陣我讀大學，過年期間遊客濟甲豉人膎，一工愛開十外幫車，導覽人員個個講甲喉嚨梢聲，阿爸就共我這个「祕密武器」搝來代班。

　　超過十冬的時間，我逐冬過年攏會佇五分仔車頂，共遊客紹介嘉南平原的風景。彼當陣的我，就是俊陽老師冊裡講的「呈現旅遊樣貌」的人──我掌握欲予遊客看啥，嘛替遊客詮釋景點的意義。這个親身的經驗，予我佇讀這本冊的時，感覺一字一句攏敲佇我的心肝頭。

　　這本冊毋但有理論，閣蓋實用。冊內有提供誠具體的創作方法，教咱按怎運用感官來描寫，甚至連寫「食食散文」的見本模仔都攢好勢矣。這是俊陽老師寄予咱的一封書，邀請咱做伙開竅，重體驗旅行的感受。

　　俊陽老師用這本冊講予咱知，旅行毋是走馬看真珠爾，是用人生體會土地的氣味。誠心推薦這本冊予每一位愛臺灣、愛文學、嘛愛旅行的朋友。

第一章　旅行文學的理論佮方法

壹　旅行文學的定義、範圍佮研究方法

　　旅行文學（Travel Literature）是一个伐文學、美學、人類學、文化研究佮地理學的迒域領域。伊的本質毋但是對「旅行經驗」的書寫，閣較是一種觀察世界、理解他者佮重新認捌自我的文化實踐。Carl Thompson（2011）佇《Travel Writing》這本冊內底指出，旅行文學是一種「佇真實佮想像之間的混合文本」，伊的核心佇「敘事者的移動經驗」和「旅途中的感知變化」。旅行書寫的人是觀察者，嘛是參與者；他的文字毋但記錄外部的世界，嘛反映心靈的轉變。

一　旅行文學的定義
　　廣義來講，見若用「移動」成做核心經驗的書寫，攏會當歸入旅行文學的範圍。伊有可能是散文、日記、遊記、報導，甚至是小說。若用內容來講，旅行文學關注的毋但干焦是目的地，而是旅行的過程佮文化接觸的經驗。佇這種脈絡之下，旅行毋但是地理空間的穿越，閣較是文化邊界的伐（Pratt, 1992）。Mary Louise Pratt佇《Imperial Eyes: Travel Writing and Transculturation》這本冊內底強調，旅行文學是一種權力結構內底的書寫行為，旅行者的觀看定定有文化中心主義抑是殖民凝視；因此，閱讀旅行文學毋但是理解風景，閣較是拆解觀看者佮予人觀看的人之間的權力關係。
　　相對歐洲殖民背景之下的旅行文學，臺灣的旅行書寫呈現出無的文化意義。對明清時期的〈東番記〉、〈裨海紀遊〉到雍正年間的《臺海使槎錄》，這三部作品共同建構出臺灣早期旅行文學的原型。陳第以明末文人的觀察眼光書寫「初見臺灣」的異地印象；郁永河用科學化的實地踏查描繪臺灣的地理佮物產；黃叔璥佇《臺海使槎錄》內底，共旅行書寫推向官方化佮制度化的層次──伊毋但干焦是遊歷記錄者，閣較是代表清廷的「疆域觀察者」。伊的文字顯示旅行文學按怎對「個人經驗」轉化做「帝國認捌」，展現出權力、智識佮地理意識的交錯。到日治時期的地誌佮報導文學，閣到戰後散文佮現代旅遊書寫，臺灣旅行文學見證歷史變遷佮多族群文化的交織。遮的文本毋但記錄自然地景、物產風土，嘛反映出無時代的人按怎透過「移動」來理解這粒島嶼（洪伯邑，2019）。

二　旅行文學的範圍
　　旅行文學的內涵誠曠闊。Thompson（2011）認為，會當對三个層面界定伊的範圍：
（一）主題層面：以旅行、走揣、遷徙佮迒界經驗為主題。
（二）文本層面：融合紀實（documentary）佮文學（literary）的雙重屬性。
（三）文化層面：反映自我佮他者、中心佮邊陲、權力佮再現的關係。

法律/政治

財經/商管/觀光

文/史/哲/期刊

理工/醫護

教育/心理/傳播

小五南/中等教育