◎專文推薦
新北市鶯歌區永吉國小校長鍾信昌
活水來冊房版主、新北市三峽區龍埔國小老師黃震南
◎徛名推薦
臺文專家「順聰款」鄭順聰
臺灣師範大學臺文系碩士班系友：
新北市三峽區三峽國小黃如莉老師
臺中市太平區新高國小李亭老師
桃園市桃園區福豐國中許正輝老師
∼以臺灣旅行文學為核心，結合感官書寫、文化觀察和地方記持，走揣旅行、權力、身體經驗和歷史空間的多重交織。∼
《旅行文學：以臺灣為例的經驗佮書寫》對清代〈東番記〉到當代城市散文，串連臺灣旅行書寫的歷史脈絡，𤆬領讀者行入山林、街仔路、海岸和飯桌仔之間的感官世界。本冊結合理論、文學佮田野觀察，深入走揣旅行內底的視覺、氣味、聲音和味覺經驗，佮旅行書寫尻脊後的文化權力、地方認同佮歷史記持。內容涵蓋清代探勘、日治旅行、戰後城市書寫、地方食食文化和現代旅遊媒介，兼顧學術深度佮文學美感。無論是文學研究者、旅行愛好者，抑是關心臺灣文化的人，攏會當對本冊重新理解「旅行」按怎成做觀看臺灣、了解世界和認捌自我的方式。
|
※書籍推薦人
◎專文推薦
新北市鶯歌區永吉國小校長鍾信昌
活水來冊房版主、新北市三峽區龍埔國小老師黃震南
◎徛名推薦
臺文專家「順聰款」鄭順聰
臺灣師範大學臺文系碩士班系友：
新北市三峽區三峽國小黃如莉老師
臺中市太平區新高國小李亭老師
桃園市桃園區福豐國中許正輝老師
|
※推薦文
推薦序1：佇行走中開展感官，佮土地深度對話／新北市鶯歌區永吉國小校長──鍾信昌
旅行的本質，到底是地理空間的徙振動，猶是心靈認知的轉變？當代旅行理論學者Carl Thompson捌講過，旅行文學是一種「真實和想像之間的混合文本」。讀完這本《旅行文學：以臺灣為例的經驗佮書寫》，讀者會當發現，臺灣這粒島嶼佇無ほ時代文人的筆下，毋但是會當治理的疆域，閣較是充滿溫度和氣味的感官場域。
這本冊毋但是一部臺灣書寫的編年史，閣較是一場𤆬領讀者軁過時空的「五感實踐」。本文作者，我亦師亦友的俊陽老師，巧妙共臺灣旅行文學劃分做幾个關鍵層次：對明清時期的探勘佮疆域觀察，到日治時期的現代化調查，閣到戰後散文內底的流浪漂泊，最後歸結佇當代食食和城市生活的深度描繪。
佇歷史的長河內底，咱看見陳第佇〈東番記〉裡初探異地的驚異，郁永河佇〈裨海紀遊〉內底結合科學佮詩性的探勘，和黃叔璥佇《臺海使槎錄》中制度化的治理視角。遮的文本證明「行走」就是智識生產的過程。進入日治時期，旅行閣較予人賦予現代性的修辭，透過張麗俊、林獻堂等人的日記，咱讀著殖民體制內底，地方菁英按怎透過旅行揣轉來自我的文化主體性。
這本冊上蓋使人入迷的部分，是對「感官經驗」的深刻探討。旅行毋但干焦是看見風景，閣較是聲音、氣味佮味覺的交織。作者精準指出，當代作家親像洪愛珠佇《老派少女購物路線》內底，共菜市仔轉化做味覺的地圖，抑是葉怡蘭佇日常煮食內底實踐「生活旅行」。遮的書寫予咱意識著，旅行無一定愛佇遠方，只要開啟感官，日常的街仔路、巷仔內佮飯桌仔，攏會當成做文化再生的場域。
另外，冊內底嘛關心數位時代的轉向。當 YouTube、Instagram 取代傳統導覽手冊，旅行敘事變甲閣較碎片化而且充滿影像動感。不而過，無論媒介按怎變遷，就親像洪伯邑教授所提倡的「田野倫理」：旅行者必須願意停落來聆聽，用尊重和互惠的姿態共地方的大門拍開。
這是一本邀請讀者「𤆬身體去閱讀」的冊。伊共咱講，每一段旅程的文字攏咧塑造世界，同時嘛咧排除抑是召喚某一寡聲音。透過這本冊，咱會當學會曉按怎對視覺中心轉向多感官的參與，佇山林、城市、離島的行走內底，重新連結人佮土地的關係。
誠心推薦這部作品予每一位佮意行走、疼惜臺灣這塊土地的讀者。
－－－－－－－－－－－－－－－－－－－－－－－－－－－－－－－－－－－－－－－－－
推薦序2：台文開竅，感受臺灣／活水來冊房版主、新北市三峽區龍埔國小老師──黃震南
有人講「冊愛加讀，所在愛行透」，毋過若是會當共「行路」的經驗，化做「寫冊」的學問，彼種境界就閣較懸。我佮俊陽老師熟似十外冬，較早伊就不時揣我替伊寫新冊的頭序，寫到尾我攏強欲記袂牢到底寫過幾本矣。有一擺，為著確定伊頂一本冊的名，走去博客來網路書店搜揣，結果發現佇一排台文作品內底，竟然有插幾本旅遊冊。彼陣我閣想講應該是「堂的兼蟯的」──ほ名ほ姓爾，後來才知影，原來這就是俊陽老師的別才：旅遊專家！
俊陽老師毋但有食福、𨑨迌內行，閣進一步共旅遊提升做一門學問。伊佇臺灣師範大學通識中心兼課，用咱上親切的台語教冊，教學生按怎欣賞「旅遊文學」。伊將台文的底蒂佮旅遊的專業智識結合，這種「手骨寫台文、雙跤踏旅途」的實作，實在予人呵咾甲會觸舌。啊這本《旅行文學：以臺灣為例的經驗佮書寫》，就是俊陽老師這幾年來，用心計較、嘔心血編寫的成果。
這本冊上顯目出擢的所在，就是伊突破傳統旅行書寫「怙看的」的束縛。現代人出外旅遊，定定是「翕相機先食」，逐家趕緊緊去「頓khà-looh」、翕相，追求的是目睭的享受。毋過俊陽老師佇冊裡強調，建立「地方意識」的關鍵，顛倒是佇耳空聽、喙舌啖佮鼻空鼻。伊用Carl Thompson的理論做基礎，𤆬領讀者去聽「聲音地景」，去揣「味覺記持」。按呢的旅行，除了是地理空間的遷徙，嘛是身軀佮土地深深的搭峇。
冊內底閣用足大篇，清點臺灣旅遊文學的頭來尾去。對清朝郁永河〈裨海紀遊〉彼種敢若咧探險的自然描寫，到日本時代文人寫佇日記的日常生活；甚至連這馬洪愛珠《老派少女購物路線》彼種都市人的生活對話，俊陽老師攏一一整理好勢，展現出臺灣人「按怎看」的演變史，咱會當看著咱的祖先佮現代人，是用啥款的角度來欣賞這塊土地。
讀到冊稿後半段，講著大稻埕街仔的感官想像，到甲旅遊會當促進文化修復佮再生，我心肝底感覺特別親切，嘛想起一段往事。
回想1990年代，阮阿爸捌佇故鄉附近擔任「社區營造」的解說員。彼陣我和阿母定定去鬥相共，招待遊客兼綴咧聽導覽。阿爸真有喙水、講笑詼袂輸竹管倒豆，我攏恬恬佇邊仔觀察遊客的反應，偷學欲按怎共地方的故事講予人聽會落心。
十冬後，蒜頭糖廠因為納莉風颱無閣做糖，開始轉型做觀光。阿爸負責規畫路線、安排解說內容，創立「坐五分仔車聽導覽」的特色。彼陣我讀大學，過年期間遊客濟甲豉人膎，一工愛開十外幫車，導覽人員個個講甲喉嚨梢聲，阿爸就共我這个「祕密武器」搝來代班。
超過十冬的時間，我逐冬過年攏會佇五分仔車頂，共遊客紹介嘉南平原的風景。彼當陣的我，就是俊陽老師冊裡講的「呈現旅遊樣貌」的人──我掌握欲予遊客看啥，嘛替遊客詮釋景點的意義。這个親身的經驗，予我佇讀這本冊的時，感覺一字一句攏敲佇我的心肝頭。
這本冊毋但有理論，閣蓋實用。冊內有提供誠具體的創作方法，教咱按怎運用感官來描寫，甚至連寫「食食散文」的見本模仔都攢好勢矣。這是俊陽老師寄予咱的一封書，邀請咱做伙開竅，重體驗旅行的感受。
俊陽老師用這本冊講予咱知，旅行毋是走馬看真珠爾，是用人生體會土地的氣味。誠心推薦這本冊予每一位愛臺灣、愛文學、嘛愛旅行的朋友。
|
魏俊陽
◎現任
新北市永和區秀朗國小教師
臺灣師範大學通識教育中心兼任助理教授
◎曾任
教育部中央輔導團本土語文組副組長、組員
新北市閩南語輔導團團員
全國語文競賽閩南語演說評審
新北市語文競賽閩南語演說、字音字形培訓老師
新北市、桃園市語文競賽閩南語演說、字音字形評審
◎語言認證
教育部105年度閩南語認證專業級
◎語文競賽
114年全國語文競賽臺灣台語演說教師組特優
◎著作
《臺灣台語認證我上強1：伊索寓言》
《臺灣台語認證我上強2：台語四格圖學習新課綱素養》
《臺語文素養導向教學全攻略》
《讀寫合一的課堂風景：國語文閱讀與寫作之旅》
《台中 玩盡台灣全中部！》2025-26激新版
I Can旅遊系列06 《高雄墾丁台南 玩盡台灣南部+澎湖！》2025-26激新版
I Can旅遊系列11《上海 蘇杭+7大水鄉深度遊》2026-27激新版
I Can旅遊系列18《沖繩 琉球群島Chill度遊！》2026-27激新版
I Can旅遊系列25《北海道 花海雪國Chill度遊！》激新版
◎共同著作
《十二年新課綱本土語文教材教法》
《十二年國民基本教育閩南語文差異化教學補充教材（國中階段）試用版》
|
推薦序１ 佇行走中開展感官，佮土地深度對話／鍾信昌
推薦序２ 台文開竅，感受臺灣／黃震南
自 序 感官島嶼：旅行文學中的臺灣書寫佮理解／魏俊陽
第一章 旅行文學的理論佮方法
壹 旅行文學的定義、範圍佮研究方法
貳 感官經驗（視覺、味、鼻、聲音）佇旅行書寫內底的角色
參 旅行文學的文化和權力關係
肆 Carl Thompson《Travel Writing》中的旅行文學理論介紹
伍 現地研究方法：洪伯邑《田野敲敲門》的田調實踐
陸 旅行文學的感官轉向和後現代觀點
第二章 清代初探的旅行書寫：〈東番記〉、〈裨海紀遊〉佮黃叔璥《臺海使槎錄》
壹 陳第〈東番記〉：臺灣上早的旅行和民族誌觀察
貳 郁永河〈裨海紀遊〉：自然探勘和智識旅行的誕生
參 黃叔璥《臺海使槎錄》：官方視角下的疆域認捌和文化觀察
肆 三部文本的比較分析：對觀察到治理的書寫轉向
伍 結語：清代旅行書寫的智識轉型和文學遺緒
第三章 日治時期的旅行文學和地方觀察
壹 日治官方調查和智識體系建構
貳 文人、旅行者和學生的地方旅行書寫
參 山林、食食、現代化的文化表述
肆 旅行書寫中的殖民想像和文化矛盾
伍 田健治郎《臺灣總督田健治郎日記》、張麗俊《水竹居主人日記》、林獻堂《灌園先生日記》之比較
陸 結語：殖民旅行書寫的遺緒和現代臺灣的反思
第四章 戰後散文和城市旅行書寫
壹 戰後散文中的旅行心境和流浪感
貳 戰後臺灣文學中的旅行和現代性
參 結語：戰後文學的影響因素和社會現象
第五章 臺灣旅遊冊的現代樣貌
壹 對導覽手冊到旅遊文學的轉變
貳 魏俊陽《台中 玩盡台灣全中部！》和《高雄墾丁台南 玩盡台灣南部＋澎湖！》案例分析
參 地方導覽和文化創生：對旅遊文學到地方敘事
肆 網路新世代旅遊介面、YouTube、Instagram、Facebook、部落格的影響
伍 結語：旅遊書寫的轉型和文化未來
第六章 邊界和山林：環島和身體的旅行書寫
壹 環島旅行文學的發展和象徵意涵
貳 山岳、探險和身體經驗的描寫
參 山林文學中的食食和生存書寫
肆 旅行文學和自然文學的交集：韓韓、馬以工《我們只有一個地球》
伍 結語：對生態觀察到文化反思──邊界意識和山林的文化地圖
第七章 城市書寫和現代性：大稻埕的旅行想像
壹 城市旅行文學內底的現代性和感官書寫
貳 大稻埕的建築、聲音、氣味和食食
參 郭雪湖〈南街殷賑〉、李臨秋〈望春風〉、鄧雨賢〈雨夜花〉的文化意涵
肆 洪愛珠《老派少女購物路線》中的都市日常
伍 結語：當代大稻埕的文學再現──地方創生、文化保存和城市旅行文學的現代性再思
第八章 建築、空間和地方文化的旅行書寫
壹 建築和旅行文學的交會
貳 地方空間和文化記持的建構
參 離島的風土民情和鄉愁
肆 農村、漁村和城市的旅行視角
伍 王惠君《臺北歷史•空間•建築》中的城市閱讀
陸 結語：地方風土、建築和文化永續──旅行文學的未來視野
第九章 風土書寫和飯桌仔旅行
壹 食食旅行和地方創生的結合
貳 食物、空間和社群的文化網路
參 地方風味和食食文學的書寫策略
肆 結語：味覺成做文化書寫的起點
第十章 旅行文學的創作方法和文學技巧
壹 感官描寫的技巧：多感官、擬人化、象徵、時間敘事、句法節奏
貳 擬人化、象徵、時間敘事和句法節奏──旅行文學的詩性建構
參 食食旅行散文的創作模組
肆 課堂實作：味覺散文、旅行筆記、創作練習
伍 結語：旅行文學的創作實踐和文化延伸
參考文獻
|
|
