|
※書籍推薦人
◎專文推薦
新北市鶯歌區永吉國小校長 鍾信昌
「活水來冊房」版主、新北市三峽區龍埔國小教師 黃震南
◎聯名推薦
臺灣師範大學雙語教育推動辦公室主任 劉美慧教授
「順聰款」版主 鄭順聰
新北市三峽國小教師 黃如莉
臺中市新高國小教師 李亭
臺南市裕文國小主任 楊芠函
臺南市麻豆國小教師 黃姿榕
高雄市五福國中主任 王崇憲
彰化縣南港國小老師 賴盈璇
雲林縣水燦林國小主任 施婉茹
|
※推薦文
推薦序1：講咱的語言，想咱的未來：一本為現代生活起造的台語活教材／新北市鶯歌區永吉國小校長 鍾信昌
語言，是咱維持生存的空氣，嘛是咱連結情感的血脈。當台語正式成做「國家語言」，按怎予伊毋但「活佇記持內底」，閣愛「活佇生活內底」，成做咱這代人上重要的課題。咱的焦慮定定是「聽有，毋過講袂輾轉」、「想袂起彼个詞欲按怎講」。俊陽寫的這本冊，就是為這个時代起造的實櫼解答。
這毋是一本傳統的課本；這是一本地圖，指引咱揣著台語佇現代生活內底的座標。
傳統教材的編排，定予人感覺佮現實生活有淡薄仔綴袂著跤步。這本冊上大的特色，就是伊的「生活主題式」架構。伊共課綱的學習內容轉化，擘畫做九大類，對「自我理解」出發，行入「日常生活」、「社區生活」的「在地特色」，閣將眼光擴展到「環境教育」、「藝術人文」，甚至到「科技運用」佮「國際認捌」。
這款的編排，毋但是分類，閣是一種學習的進路：對內到外，對家己到世界。咱會當學著按怎用台語表達家己的「情緒」、講出家己的「個性」；嘛會當討論家庭分工（親像「佇厝鬥摒掃」）佮生涯規劃（「行行出狀元」）。予台語學習者對一開始，就建立起「台語就是生活」的觀念。
伊拍破一个迷思：啥物人講台語干焦會當講古早的代誌？
這本冊予我上感動的，是伊勇敢閣堅定共台語 入「現代議題」的殿堂。伊共咱證明，台語絕對有能力、嘛有必要去承載複雜、深刻、閣前衛的思考。
當咱咧煩惱網路霸凌，咱會當讀著「網路起風波」，學習按怎用台語討論法律佮網路禮儀。當咱咧關心性別平權，咱會當看著「金牌 bo̍k-sìn-gù（拳擊）」，對bo̍k-sìn-gù 選手林郁婷的故事，討論「性別平等」的主題。當全世界咧面對氣候變遷，咱會當透過「拯救地球行動」佮「節能減碳」，學習用母語來思考咱對環境的責任。當AI 浪潮席捲而來，咱嘛有「AI 當著時」這个單元。甚至，咱會當用台語反思「火燒島的記持」，看見歷史佮人權。
這毋但是語言教材，這根本就是一本現代公民素養的讀本。伊予咱建立起一種「雙語思考」的能力──會當用華語思考的，嘛會當用台語來思考，而且台語所想的，定定閣較有在地的氣味佮情感的厚度。
為著予學習者「會曉用」，伊建構一个完整的學習循環，鍛鍊「聽、講、讀、寫」的全方位能力。每一个主題，攏對「看圖講話」開始，刺激表達的欲望；了後提供「A 卷30 秒」佮「B卷 1 分鐘」的參考答案，是非常實用的訓練。紲落來的「情境演說」佮Q&A，是表達能力的進階。對輸入面來講，「文章朗讀」培養語感，「閱讀測驗」確認理解。上煞尾，用「語句書寫」收尾，共所學的詞彙實際運用。這一个完整的循環，對被動吸收到主動產生，予學習者毋但是「會曉聽」，閣較是「會曉用」。
語言的流失，上驚的就是「無話通講」。
俊陽寫的這本冊，就是咧替台語「創造情境」，伊共咱生活內底會拄著的大細項代誌，攏共款款攢好勢。予咱知影，原來咱會當用台語關心「石虎的危機」，嘛會當用台語去「野柳𨑨迌」，會當欣賞「廟口看歌仔戲」，嘛會當討論「布袋戲誠趣味」。
這是一本充滿熱情佮理想的冊。誠心邀請每一位讀者，拍開這本冊，大聲共伊讀出來，予這寡美麗的詞彙佮生動的語句，充滿咱的厝、咱的學校、咱的社區。咱做伙來學台語，用咱的母語，講出咱家己的故事，共台語「講轉來」。
------------------------------------------------------------------------------------------
推薦序2：練台語，才綴會著時代／新北市三峽區龍埔國小教師、臉書粉專：「活水來冊房」版主 黃震南
這幾年來，「考認證」成做一項全民運動，毋管查埔查某、大漢細漢，逐家樓頂招樓跤，攏去考認證；尤其佇中小學，熱心的老師閣會𤆬規群囡仔去團體報名，所擺咱佇認證的考試場，嘛看著愈來愈濟囡仔。
這个現象嘛反映佇最近幾冬的統計：考A 卷的人真濟，考有過A1 的人比考有過A2 的人比例加真懸；這種現象嘛出現佇B 卷，B1 的通過率超過60、70%，毋過通過B2 的干焦十幾%，有時陣甚至無到10%。
看著按呢的情形，予人感覺真歡喜，嘛感覺真無彩──咱歡喜講推行考台語認證十外冬，到今猶閣真濟人欲考，而且少年人、囡仔人愈來愈濟，是真好的趨勢；毋閣又感覺有影無彩，人講「造塔，著造透尾」，逐家若像就干焦差一步爾，就會當進階到A2、B2 矣，無考著實在毋甘願啦！
來來來，緊來緊來，你差彼一步，俊陽老師來共你鬥打扎。這本《臺灣台語認證我上強2：台語四格圖學習新課綱素養》收錄30 个故事，予你對頭練到尾，功力聽好增加一甲子！
這本冊的內容，完全針對現此時的台語認證來設計。伊將所有的單元，分做真濟主題：對「自我理解」一直到「日常生活」，閣有「環境教育」、「科技運用」等等。內底收錄的題目，攏是對日常生活中千百萬項代誌揀甲仁仁仁的題材，予人讀著袂感覺無聊，而且真實用。
比論講，有關「自我理解」的議題，就有「愛受氣的阿新」（性地控制）、「行行出狀元」（生涯規劃）。有關「公民社會」的議題，有「金牌bo̍k-sìn-gù（拳擊）」（性別平等）、「頭擺投票的體驗」（民主素養）、「網路起風波」（網路倫理）、「優先席新聞」（公民素養）等等 。上讚的是閣有「文化佮環保」的議題，介紹台語傳統文化（俗語、布袋戲、歌仔戲），關心環境教育和國際議題，比論講淨灘、石虎危機、海洋保育、AI 科技運用佮節能減碳。論真講，咱一般人日常生活，該讀冊上班的，每日無閒咧拚考試、顧三頓，哪有時間了解遮濟議題？這本冊攏攢便便咧等你，練台語閣兼吸收智識、訓練思考能力。
每一篇閣有佮「看圖講話」、「文章朗讀」、「閱讀測驗」、「語句書寫」四大題型，毋但予讀者會曉讀、會曉寫，閣會曉講，是一套完整訓練聽、說、讀、寫四項能力的教材，幫助學習者拍底蒂。
這本冊適合所有的台語學習者，特別是：
一、準備考台語認證的考生。
二、 學校老師佇教學上欲揣貼近生活、多元、時行的題材。
三、對臺灣文化、時事有興趣的自學者。
我閣建議兩个使用這本冊的撇步：
一、毋通將伊干焦當做一本考試用冊，著愛用伊的情境來做「興沬式」的學習。逐工選一个情境，比論講「佇厝鬥摒掃」，著愛應用句型，佮厝內的序大、朋友對話，將台語當做日常生活的溝通工具，毋是家己讀予冊聽爾爾，冊嘛袂共你應！（「沉浸式」有人翻譯做「浸水式」、「浸汰式」，毋過我家己翻譯做「興沬式」，這个「沬」字除了藏落去水底，嘛有「強烈想欲創啥」的意思，所以「興沬式」毋但是浸佇環境爾，閣愛有熱情、熱愛，著愛到真痟的地步！）
二、練習「情境演說」的時，著愛家己錄音起來，一直聽、一直校正，甚至共錄音檔傳予序大聽看覓。到你感覺伊「有影是阿母／阿爸／阿公／阿媽咧講話的氣口」彼時，你的台語就真老矣！
這本冊是一本誠有系統、內容豐富、閣有現代精神的台語教材，是推廣台語足實用的工具冊。我誠心推薦這本教材予逐家，向望台語的未來，會當傳承文化，閣會當連結著新時代，希望逐家來鬥陣推廣。
|
魏俊陽
◎現任
新北市永和區秀朗國小教師
臺灣師範大學通識教育中心兼任助理教授
◎曾任
教育部中央輔導團本土語文組副組長、組員
新北市閩南語輔導團團員
全國語文競賽閩南語演說評審
新北市語文競賽閩南語演說、字音字形培訓老師
新北市、桃園市語文競賽閩南語演說、字音字形評審
◎語言認證
教育部105年度閩南語認證專業級
◎語文競賽
114年全國語文競賽臺灣台語演說教師組特優
◎著作
《臺灣台語認證我上強1：伊索寓言》
《臺語文素養導向教學全攻略》
《讀寫合一的課堂風景：國語文閱讀與寫作之旅》
《台中 玩盡台灣全中部！》2025-26激新版
I Can旅遊系列06 《高雄墾丁台南 玩盡台灣南部+澎湖！》2025-26激新版
I Can旅遊系列11《上海 蘇杭+7大水鄉深度遊》2026-27激新版
I Can旅遊系列18《沖繩 琉球群島Chill度遊！》2026-27激新版
◎共同著作
《十二年新課綱本土語文教材教法》
《十二年國民基本教育閩南語文差異化教學補充教材（國中階段）試用版》
|
推薦序１ 講咱的語言，想咱的未來：一本為現代生活起造的台語活教材
推薦序２ 練台語，才綴會著時代
序 言 做伙講台語，綴世界的跤步向前行
◎自我理解類
愛受氣的阿新
金牌bo̍k-sìn-gù（拳擊）
一人一个性
行行出狀元
◎日常生活類
佇厝鬥摒掃
安全愛注意
優先席新聞
金牌羽毛球
俗語誠趣味
野柳好𨑨迌
網路起風波
◎社區生活類
神明生
頭擺投票的體驗
做伙講台語
◎環境教育類
鬥陣來淨灘
石虎的危機
海龜新樂園
寒流有夠寒
南方四島：海洋奇觀的冒險
◎科技運用類
AI當著時
◎藝術人文類
廟口看歌仔戲
布袋戲誠趣味
◎人際溝通類
火燒島的記持
◎在地特色類
阿勇的蓮霧園
阿珍的農業夢
守護大海
中秋的幸福
◎國際認捌類
無國界醫師
拯救地球行動
節能減碳
|
|
